Mirësevini në Faqën Zyrtare të
The Bislimi Group
...duke ndihmuar në realizimin e ëndërrave...

English

 Faqja Amë
 

 Shkrimet
 

 Intereset
 

 Komentet
 

PROJEKTET:

Bursat për Studime Universitare në Amerikë 2007-2008
 

The Bislimi Group me krenari ju prezanton librin e parë të Faton Bislimit në fushën e analizës politike e shoqërore si një kompoze shkrimesh të ndryshme të para nga prizma e të qenurit përtej Atlantikut. Autori si dhe Grupi e falëmderon nga zemra botuesin që ka bërë publikimin e këtij libri – Jalifat Group Publishing – nga Hjustoni i Teksasit, SHBA, si dhe sponzorin e publikimit, z. Ramiz Tafilaj, President i Jalifat Group Publishing. 

Autor: Faton Bislimi 
Titulli: Në Rrugëtim me Kosovën: Tatëpjetat dhe të Përpjetat 
Botues: Jalifat Group Publishing, Hjuston, Teksas, SHBA 
Botimi i parë: Prill 2006 
ISBN:

Ju lutem na shkruani në publications@bislimi.org për të porositur kopjen tuaj personale të librit Në Rrugëtim me Kosovën: Tatëpjetat dhe të Përpjetat.  

Për të mësuar më shumë për këtë libër, në vazhdim po ju japim atë që disa nga liderët dhe figurat më të ndritura të politikës shqiptare në SHBA dhe të letrave shqipe në botën e gazetarisë e kanë thenë për librin Në Rrugëtim me Kosovën: Tatëpjetat dhe të Përpjetat.

Hyrje
Joseph J. DioGuardi
Ish-Kongresist Amerikan dhe Kryetar i Ligës Qytetare Shqiptaro-Amerikane
Shirley Cloyes DioGuardi
Publiciste dhe Këshilltare për Çështje të Ballkanit në LQSHA
Nju Jork, SHBA

Parathënie
Skender Buçpapaj 
Kryeredaktor, Gazeta e Përditëshme Kombëtare "Bota Sot"
Zurich, Zvicër 

Fjala e Botuesit
Ramiz Tafilaj 
Biznesmen dhe President i Jalifat Group Publishing
Hjuston, SHBA

Pasi të keni lexuar atë që është thënë për këtë libër nga kompetentët, nuk mund të mos doni ta keni edhe ju kopjen tuaj personale të librit Në Rrugëtim me Kosovën: Tatëpjetat dhe të Përpjetat.  Pra, na shkruani menjëherë në publications@bislimi.org për të porositur kopjen tuaj.

 
Hyrje

Në Mars 2002, Faton Bislimi, atëherë student universiteti në Hjuston të Teksasit, na kishte kontaktuar përmes faqës sonë në internet të Ligës Qytetare Shqiptaro-Amerikane—lobit vullnetar që ne e drejtojmë së bashku me një bord të shqiptaro-amerikanëve për të mbrojtur të drejtat njerëzore, politike, dhe qytetare të popullit shqiptar në ish-Jugosllavi dhe Shqipëri. Në atë kohë, Fatoni ishte ftuar të marrte pjesë në një konferencë ndërkombëtare të liderëve të rinjë në Pragë, ku ai do të përfaqësonte rininë e Kosovës, atdheut të tij. Ai kishte përcjellur me vëmendje punën e Ligës sonë Qytetare në Washington, DC për pavarësinë e Kosovës dhe ndjente se, pasi që ishte i vetmi shqiptar i ftuar për pjesëmarrje në këtë konferencë, e kishte për obligim të paraqiste çështjen tonë për pavarësinë e Kosovës para liderëve të rinjë evropianë. Na kishte thënë se këtë udhëtim do ta ndërmerrte gjatë pushim dimëror nga shkolla, por se i duhej përkrahje financiare për të mbuluar shpenzimet e udhëtimit dhe akomodimit, një pjesë e të cilave nuk ishin mbuluar nga nikoqiri i konferencës.

Ne ishim impresionuar tejmase nga iniciativa e Fatonit për të kontaktuar me neve drejtpërsëdrejti duke na e paraqitur idenë e tij në një projekt-propozim të mrekullueshëm për të përfaqësuar çështjen më të rendësishme për Kosovën dhe për të gjithë shtat milionë shqiptarët në Ballkan, dhe prandaj kishim kontaktuar miq e kolegë për të bërë të mundur prezencën e tij në Pragë. E gjithë kjo u shndërrua mandej në një partnership madhor midis nesh. Prezantimi i Fatonit në këtë konferencë kishte marrë nderime të mëdha, dhe ai pati mundësinë që t’u jepte mëse njëqind pjesëmarrësve në konferencë një perspektivë të re në lidhje me kushtet në të cilat kanë jetuar shqiptarët shumëvuajtur të Kosovës që vet Fatoni i kishte përjetuar personalisht. 

Fatoni u kthye nga Praga për të vazhduar studimet e tij të dyfishta në shkenca kompjuterike dhe matematikë në Texas Lutheran University. Me thellimin e bashkëpunimit tonë, bëhej edhe më e kjartë për ne se kapaciteti i tij intelektual ishte i jashtëzakonshëm, ashtu sikur edhe kreativiteti, frytshmëria, dhe përkushtimi i tij ndaj çështjes kombëtare shqiptare.  Ne kërkuam që Fatoni të bëhej Koordinator për Çështje të Studentëve dhe Rinisë pranë Ligës Qytetare. Ai këtë e pranoi me kënaqësi dhe menjëherë iu përkushtua punës për të krijuar një faqe të veçantë në internet nën sponsorimin tonë të quajtur “Albanian Students International,” dhe vazhdoi të udhëheqë e të kryejë disa nga projektet tona më të rëndësishme që kërkonin aftësitë e tij të fuqishme si shkrimtar dhe përkthyes simultan në Shqip dhe Anglisht. 

Gjatë tri viteve që ne kemi punuar me Fatonin, ai na ka ndihmuar në shumë mënyra për të ngritur vetëdijen publike shqiptare në lidhje me punën e Ligës Qytetare në Washington dhe nëpër botë, si dhe ka shërbyer si një ambasador efektiv yni në Evropën Perëndimore dhe në Shtetet e Bashkuara. Disa herë ka koordinuar dhe organizuar vizitat e delegacioneve tona Kongresionale në Kosovë, duke shërbyer si përkthyes zyrtar por edhe koordinator. Në këto raste, ai është ndihmuar edhe nga babai i tij, Halit Bislimi, një profesionist tejet i aftë, inxhinier, që kishte humbur vendin e tij të punës në Gjilan pas instalimit të pushtetit serb në Kosovë, por gjithënjë kishte vazhduar t’i kontribuojë në shumë mënyra përpjekjeve të vendit të tij për pavarësi. 

Fatoni gjithashtu ka shërbyer edhe si përkthyes zyrtar simultan Anglisht-Shqip gjatë misionit faktmbledhës së Ligës sonë Qytetare në Gusht 2003 në trojet shqiptare në Mal të Zi së bashku me Kongresistin Tom Lantos, Demokratin numër një në Komitetin për Marrëdhënie Ndërkombëtare të Kongresit të SHBA-ve.  Ky udhëtim kishte shënuar edhe vizitën e parë të një Kongresisti Amerikan në këtë rajon si dhe iniciativën e parë të diasporës shqiptaro-amerikane për të adresuar edhe çështjen e shqiptarëve në Mal të Zi në shekullin njëzet-e-një. Ky udhëtim shënoi edhe fillimin e karierës së Fatonit si autor.  Një prej shkrimeve të para të Fatonit në Anglisht (që ishte botuar nga gazeta shqiptaro-amerikane Illyria) ishte frymëzuar nga puna e tij si përkthyes në Dëgjimin Kongresional të Komitetit të të Drejtave të Njeriut mbi të “Ardhmen e Shqiptarëve në Mal të Zi” në Tetor 2003.  Ky ishte edhe udhëtimi i tij i parë për në Washington, DC. 

Kongresisti Lantos ishte impresionuar nga puna e Fatonit në këtë dëgjim kongresional, dhe si rezultat kishte aprovuar një punë praktike për Fatonin në Stafin Demokratik të Komitetit për Marrëdhënie Ndërkombëtare të Kongresit të SHBA-ve gjatë verës së vitit 2004.  Një prej gjërave më të rëndësishme që kishte bërë gjatë punës në Kongres, me kërkesë të këshilltarës së lartë për politikë të jashtëme të Kongresistit Lantos, ishte përgatitja e një informatori ditor në lidhje me Ballkanin me informacione nga burime të ndryshme mediale, qeveritare, e akademike, për anëtarët e ekzekutivit të Komitetit për Marrëdhënie me Jashtë.

Kështu, Fatoni vazhdoi që të shkruajë edhe një sër shkrimesh tjera, që ishin botuar kryesisht në Bota Sot dhe Illyria. Duke parë talentin e tij, Elida Buçpapaj, kolumniste dhe editore në Bota Sot, si dhe kryeredaktori Skënder Buçpapaj i ofruan Fatonit mundësinë e të shkruarit rregullisht në Bota Sot si komentator e analist më 2005. “Në Rrugëtim me Kosovën: Tatpjetat dhe të Përpjetat” është një koleksion i shkrimeve të tij gjatë dy viteve të shkuara. Ky libër paraqet një perspektivë të rëndësishme për Kosovën e pasluftës dhe për çështjen kombëtare shqiptare të parë përmes prizmës së një shqiptari të ri nga Kosova, i cili edhe pse shumë i përkushtuar ndaj kombit dhe vendit, ishte dashur ta lë Kosovën për shkak të ngjarjeve të historisë për të studijuar jashtë. Tani, Fatoni është studijues në Shkollën Postdiplomike të Qeverisjes John F. Kennedy të Universitetit të Harvardit, ku është duke magjistruar në administratë publike dhe zhvillim ndërkombëtar. Ai pret që së shpejti të kthehet për të jetuar dhe punuar në një Kosovë të pavarur. 

Shqiptarët gjithëkund—qofshin nga Kosova, Maqedonia, Mali i Zi, Shqipëria, Lugina e Preshevës, Çamëria, apo diaspora—kanë nevojë për intelektualë të rinjë të përkushtuar ndaj çështjes kombëtare sikur Faton Bislimi. Me të lexuar të shkrimeve të tij të paraqitura në këto faqe, edhe ju do të kuptoni pse është kështu.

Joseph J. DioGuardi
Ish-Kongresist Amerikan dhe Kryetar i Ligës Qytetare Shqiptaro-Amerikane
Shirley Cloyes DioGuardi
Publiciste dhe Këshilltare për Çështje të Ballkanit në LQSHA
Nju Jork, SHBA

<<kthehu<<
    

*  *  * 

Parathënie

“Në Rrugëtim me Kosovën: Tatëpjetat dhe të Përpjetat” është një frymëmarrje e mirëfilltë shqiptare në ajrin e Amerikës

Në një kohë kur del me librin e tij të parë, Faton H. Bislimi është sot një ndër përfaqësuesit më në zë të brezit më të ri të intelektualëve shqiptarë. I lindur dhe i rritur në Kosovë, brenda pak vitesh të qëndrimit në Amerikë, ai ka arritur në një lartësim të personalitetit të tij dhe në një pjekuri të admirueshme të mendimit të tij për fatet tona kombëtare. 

Natyrisht Kosova është tema e shqetësimeve të Faton H. Bislimit në librin e tij “Në Rrugëtim me Kosovën: tatëpjetat dhe të përpjetat”. I edukuar në shkollën amerikane të mendimit politik, Faton H.Bislimi ka dëshmuar se për asnjë çast nuk e ka ndjerë veten të shkëputur nga toka dhe nga jeta e Kosovës, se gjithnjë e ka ndjerë veten pjesë të shqetësimeve, të luftës, të idealeve kombëtare të Kosovës.

Ka disa vjet tashmë qëkur Fatoni është bashkëpunëtor i rregullt i gazetës kombëtare “Bota Sot” me analizat e tij për çështjet më të mprehta dhe më të freskëta të zhvillimeve në Kosovë dhe të zhvillimeve ndërkombëtare për Kosovën, çka është një nder i vërtetë për gazetën tonë kombëtare. Këto analiza tregojnë se ai është gjithnjë në kontakt me gjithçka që shkruhet dhe flitet për Kosovën në literaturën më elitare të Amerikës dhe në institucionet më të specializuara e më të fuqishme të Amerikës, aq sa është papushim i lidhur me përditshmërinë e Kosovës, ku ka familjen dhe të afërmit e tij, ku e shikon realizimin e plotë të popullit të tij, veçanërisht të brezit të tij. 

Në shkrimet e përmbledhura në librin e Fatonit ndjehet saktësia dhe ndjeshmëria me të cilën ai i ka regjistruar lëkundjet sizmike, pehamat nëpër të cilat ka kaluar Kosova përgjatë këtyre viteve plot tragjedi dhe shpresa, pehama të cilat autori i librit i ka karakterizuar si tatëpjeta dhe të përpjeta, pra si fundosje dhe si lartësime të Kosovës, duke u kapur përfundimisht në bregun e shpresës, në bregun e së ardhmes. 

Libri “Në Rrugëtim me Kosovën: tatëpjetat dhe të përpjetat” del në një kohë kur Kosova ka hyrë në fazën e bisedimeve me Perëndimin për t’ia dhënë trajtën zyrtare shtetit të saj të pavarur dhe sovran. Autori i librit është një nga ata mendimtarë perëndimorë të Kosovës dhe të kombit shqiptar që përpiqen ta shëmbëllejnë Kosovën me përvojat më të mira shtetërore të cilat ata i kanë jetuar dhe i kanë studiuar në Perëndim, duke sjellë në rreshtat e librit modele nga më të parapëlqyerat e tyre si për zgjidhjen në tërësi të çështjes së Kosovës, ashtu për funksionimin në veçanti të përbërësve të shtetit dhe të jetës së Kosovës. Edhe këtu autori dëshmon sa pjekuri aq edhe përgjegjshmëri prej atdhetari perëndimor për Kosovën.

Nuk mungojnë në librin e Faton H. Bislimit ballafaqimet me armiqtë dhe kundërshtarët e çështjes së Kosovës, notat e theksuara polemiste kundër dredhive të reja, dinakërieve të reja, prapashpinave të reja në kurriz të fatit të Kosovës, përpjekjeve rrufjane për të ringjallur aleancat e dikurshme gjakatare dhe për të rikrijuar fronte të kobshme që do të pengonin proceset e Kosovës, të Evropës dhe të hapësirës veriatllantike në tërësi. 

Faton H. Bislimi është ndër shqiptarët më të suksesshëm që ka realizuar brenda pak vitesh shumëçka nga ajo që quhet ëndërra amerikane. Ai është i vetmi në brezin e tij dhe ndër të paktit shqiptarë në përgjithësi që ka marrë frymë pothuaj në të gjitha institucionet në kreun e Shteteve të Bashkuara të Amerikës që ka parë si punojnë hallkat e ndryshme të sistemit gjigant amerikan, ku frymon edhe vizioni shpëtimtar amerikan për Kosovën dhe për kombin shqiptar. Këto përvoja ai i ka pasqyruar me ndjenjë të pastër e të dlirë në shkrimet e tij, duke e parë ëndërrën amerikane si pjesë të ëndërrës së tij shqiptare. Kjo ka bërë që idealisti dhe realisti me këmbët krejtësisht në tokë të pajtohen aq mrekullueshëm në autorin e librit dhe në mendimet që përftohen aty. 

Lexuesi do të ketë vetë mundësinë të vërejë nëpër faqet e librit se autori aq sa i përkushtohet kërkesës së lartë për realizimin e gjinive të larmishme publicistike, nëpërmjet të cilave i shpalos vizionet dhe përsiatjet e tij, me po aq këmbëngulje dhe me po aq dashuri ai i përkushtohet lëvrimit sa më mjeshtëror të gjuhës shqipe, nëpërmjet të cilit mishëron nivelin artistik të shprehjes në publicistikën e tij.

“Në Rrugëtim me Kosovën: tatëpjetat dhe të përpjetat” është një frymëmarrje e mirëfilltë shqiptare në ajrin e Amerikës. Ai përbën një hap të parë vendimtar në karrierën e një mendimtari të fuqishëm kombëtar perëndimor, siç është autori i librit, Faton H. Bislimi. 

Autori është i ri në moshë, por përvoja relativisht e pasur e arritjeve të jetës së tij në pak vite në Amerikë, tregon se ai është nga ata shqiptarë të rinj që për asnjë çast nuk kënaqet me arritjet e veta, tregon se ai është një shqiptar i ri me qëllime të larta në jetë si për veten, ashtu edhe për Kosovën dhe çështjen shqiptare në përgjithësi, ashtu edhe për vendin mikpritës, Amerikën, shpëtimtaren e kombit shqiptar, çlirimtaren e Kosovës, së cilës ai i është mirënjohës për jetë të jetëve. 

Lexuesit nuk do ta humbin rastin të lexojnë librin e parë të Faton H. Bislimit, që të kenë pastaj mundësinë për ta përcjellë hap pas hapi rritjen e tij të sigurtë në fushat e karrierës të mendimtarit i cili përherë e më shumë do të dëgjohet dhe do të respektohet.

Skender Buçpapaj 
Kryeredaktor, Gazeta e Përditëshme Kombëtare "Bota Sot"
Zurich, Zvicër 

<<kthehu<<

*  *   * 

Fjala e Botuesit

Mërgimi është një plagë që ka lënduar kombin shqiptar për shekuj. Por, në të njejtën kohë, sa ka qenë i dëmshëm, në disa raste edhe ka qenë i dobishëm. Nuk është lehtë për askënd që të lë shtëpinë, vendin e lindjes, familjen, farefisin, miqtë, e dashamirët, dhe të ecën drejtë një shtegu të panjohur, të futet në pyllin e errët të pasigurisë, të cilit nuk i dihet as fundi. Mirëpo, koha ka bërë që shqiptarët, duke qenë shumëherë nën okupimin e regjimeve brutale, të marrin këtë rrugë të errët duke bartur me vete vetëm shpresën për pak dritë në fund të errësirës. 

Kur njeriu aftësohet të ecën edhe rrugës së errët, atëherë ai bëhet shumë më i shkathët të ecën rrugës me dritë.  Fati që i bëri shumë shqiptarë të ecën kësaj rruge të errët të mërgimit, në të njëjtën kohë i bëri ata edhe më të aftë që të ecin rrugës me dritë. Dhe, kështu arritën që shumë nga ta të krijonë emra me renome botërore – të behën lavdia dhe krenaria e gjithë shqiptarisë. 

Largësia nga vendlindja për mërgimtarin është plagë e rëndë në zemër. Por jo vetëm kaq, ajo është edhe energji e shtyrje që në zemrat mërgimtare vendlindja, kombi, gjuha, zakonet e tradita, të mbesin të pacënuara dhe gjithënjë të freskëta. Edhe sikur shumë paraardhës mërgimtarësh shqiptarë të vjetër, ashtu edhe disa nga gjeneratat më të reja të mërgimtarëve, po tregojnë se vlerat e tyre kombëtare i mbajnë në majën e krenarisë së tyre. 

Dhe, pa aspak dyshim, kjo dëshmohet nga puna, krijimtaria, dhe përkushtueshmëria ndaj atdheut e vet autorit të këtij libri, Faton Bislimit. Qysh në ditët e para të jetës së tij në Amerikë, Fatoni i kishte dhënë vetit për obligim të vendoste ndër prioritetet e para çështjen kombëtare. I ardhur në Shtetet e Bashkuara me mision të qartë – për t’u shkolluar – Fatoni, jo vetëm që ia dual të përmbyll këtë mision me rezultate fantastike akademike, duke diplomuar në Shkenca Kompjuterike dhe Matematikë nga Texas Lutheran University me nderimet më të larta akademike, por edhe i tejkaloi qëllimet e misionit të tij fillestar, duke arritur që të sigurojë vendin meritor në vazhdimin e studimeve postdiplomike në Shkollën Postdiplomike të Qeverisjes John F. Kennedy të Harvard University, universitet ky që e ëndërrojnë qindra mijëra studentë të dalluar nga e mbarë bota. 

Por, as sukseset akademike, as të arriturat përtej diplomimit universitar nuk e kënaqen Fatonin. Ai vazhdoi, me përkushtim të plotë, të punojë në kauzën kombëtare. Më kujtohet fare mirë shkrimi i tij i parë që kisha lexuar në internet në vitit 2002 në lidhje me Rezolutën e Kuvendit të Kosovës për përcaktimin e Territorit të Kosovës. Mendimi i tij analitik dhe karakteri bindës më patën bërë kurreshtar qysh atëherë të njihja më mirë këtë bashkëkombas. Dhe, që atëherë, me seriozitetin më të madh kam përcjellë të gjitha shkrimet dhe punimet e tij, për të cilat, besoj se edhe vet lexuesi do të arrijë tek konkludimi i njejtë – cilësia është karakter i padiskutueshëm, mendimi analitik është baza argumentative, dhe gjuha e pastër shqipe është bukuria e shkrimeve të Faton Bislimit. 

“Në Rrugëtim me Kosovën: Tatëpjetat dhe të Përpjetat” nuk është vetëm një libër për lexim relaksimi, por mbi të gjitha është një libër i veçantë në të cilin tema kryesore, që është Kosova dhe çështja kombëtare shqiptare, rrihet nga shumë kënde prizmike. Me shumë të drejtë, autori e titullon librin “Në Rrugëtim me Kosovën: Tatëpjetat dhe të Përpjetat”. Edhepse largë vendlindjes, ai gjithënjë jetoi në të. Ai rrugëtoi me të – ishte pjesë e rrugëtimit të Kosovës. Duke e ruajtur me agrisivitet intelektual çëshjen kombëtare shqiptare, veçanërisht në kontekstin e Kosovës, Fatoni me vend flet për “tatëpjetat” dhe “të përpjetat” e rrugëtimit të tij me Kosovën. Gjithënjë me motiv realiteti, ai i përkushtohet pasqyrimit të ngjarjeve në Kosovë apo të lidhura me Kosovën qofshin ato të dëmshme (tatëpjeta), apo të dobishme (të përpjeta).  

Jalifat Group, jo vetëm që mburret që ka sjellur këtë tekst në duart e lexuesve, por në të njejtën kohë beson se ky botim i kontribuon zgjimit të një interesimi më të madh tek gjeneratat e reja të shqiptarëve mërgimtarë për sa i përket çështjes kombëtare shqiptare në përgjithësi, dhe fatit të Kosovës në veçanti. Edhepse i futur në rrugën e errët të mërgimit në një moshë shumë të re, Fatoni arriti që nga kjo errësirë të dalë me pishtar në dorë – me dritën e diturisë, dritën më të fortë të njerzimit, dritën që nuk shuhet kurrë. Le të shërbejë puna e tij si shembull. Dhe, le të vazhdojë udhëtimi i tij edhe më tej – drejt sukseseve akademike, profesionale, jo vetëm për të, por për të gjithë popullin bir i denjë i të cilit është. 

Ramiz Tafilaj 
Biznesmen dhe President i Jalifat Group Publishing
Hjuston, SHBA

<<kthehu<<

Faton H. Bislimi

Libri më i ri:
Në Rrugëtim me Kosovën:
Tatëpjetat dhe të Përpjetat
 

Kush Jemi Ne?

Info për Kontakt